Главная\Богослужение\Особые молебные прошения и молитвы

Особые молебные прошения и молитвы

479746_4bmZdmHW
Особые молебные прошения (читаемые во время молебна на сугубой ектении и в конце его, а также при освящении различных предметов и вещей)
На всякое прошение
Благодарственный

Благодаряще со страхом и трепетом яко раби непотребнии Твоему благоутробию, Спасе и Владыко наш Господи, о Твоих благодеяниих, яже излиял еси изобильно на рабех Твоих, и припадаем, и славословие Тебе яко Богу приносим, и умиленно вопием: избави от всех бед рабы Твоя, и всегда яко милостив исполни во благих желание всех нас, прилежно молимся Ти, услыши и помилуй;

Якоже ныне милостивно услышал еси молитвы рабов Твоих, Господи, и явил еси на них благоутробие человеколюбия Твоего, сице и в предняя не презирая, исполни во славу Твою вся благая хотения верных Твоих, и яви всем нам богатую милость Твою, вся нам согрешения презирая: молимся Ти, услыши и помилуй;

​​​​​​​Благоприятно, яко кадило благовонное и яко тучная всесожжения, да будет, Всеблагий Владыко, благодарение сие наше пред величеством Славы Твоея, и низпосли всегда яко щедр рабом Твоим богатыя милости, и щедроты Твоя, и от всех сопротивлений видимых и невидимых врагов Церковь Твою Святую (обитель сию, или град сей, или весь сию) избави, людем же Твоим всем безгрешное со здравием долгоденствие, и во всех добродетелех преспеяние даруй, молим Ти ся, Всещедрый Царю, милостивно услыши и скоро помилуй.
О болящих

Врачу душ и телес, со умилением в сердце сокрушенном к Тебе припадаем, и стеняще вопием Ти: исцели болезни, уврачуй страсти душ и телес рабов Твоих (имярек), и прости им, яко благосерд, вся прегрешения, вольная и невольная, и скоро воздвигни от одра болезни, молим Ти ся, услыши и помилуй.

Не хотяй смерти грешных, но еже обратитися, и живым им быта, пощади и помилуй рабов Твоих (имярек), Милостиве: запрети болезни, остави всю страсть, и весь недуг, и простри крепкую Твою руку, и якоже Иаирову дщерь от одра болезни воздвигни и здравых сотвори, молим Ти ся, услыши и помилуй.   Хор: Господи, помилуй.

​​​​​​​Огненную болезнь Петровой тещи прикосновением Твоим исцеливый, и ныне люте страждущих рабов Твоих (имярек) болезнь благосердием Твоим исцели, здравие им скоро подавая, прилежно молим Ти ся, Источниче цельбам, услыши и помилуй.
О путешествующих

Стопы.человеческия исправляяй, Господи, призри милостивно на рабов Твоих (раба Твоего, рабу Твою) (имя рек) и простив им (ему, ей) всякое прегрешение вольное же и невольное, благослови благое намерение совета их (его, ея) и исходы и входы с путешествием благополучными соделай, прилежно молимся Тебе, услыши и помилуй.

Иосифа от озлобления братий его преславно свободивый и во Египет того приведый и благословением Твоея благости во всем благополучна сотворивый, и рабов Твоих (раба Твоего, рабу Твою) путешествовати хотящих , благослови и шествие их (его, ея) безмятежно и благополучно сотвори, молимся Тебе, услыши и помилуй.

Исааку и Товии Ангела спутника пославый, и тем путешествие и возвращение их мирное и благополучное сотворивый, и ныне, Преблаже, Ангела мирна рабам Твоим (рабу Твоему, рабе Твоей) ныне Тебе молящимся (молящемуся, молящейся) посли, да наставит их (его, сию) на всякое дело благое и избавит от врагов видимых и невидимых и от всякаго злаго обстояния, во здравии же мирно и благополучно к славе Твоей возвратит, усердно молимся Тебе, услыши и помилуй.
​​​​​​​
Луце и Клеопе во Еммаус спутешествовавый и весело во Иерусалим возвратитися Твоим преславным познанием сотворивый, спутешествуй Твоею благодатию и Божественным благословением и ныне рабом Твоим сим (имярек), нами Тебе прилежно молящимся, и во всяком деле блазе, к славе Пресвятаго Твоего Имени, благопоспеши, во здравии и благополучии соблюдая и возвращая во время благоподобно, яко Всещедрому Благодателю, молим Ти ся, скоро услыши и милостивно помилуй.
О призывании помощи Святаго Духа перед началом всякого дела  (перед началом благого дела)


Призри, Человеколюбче, милостивым Твоим оком на рабы Твоя (или на раба Твоего) имярек, к Твоему благоутробию верою припадающыя (или припадающаго), и услышав моления их (или его), благое намерение и дело их (или его) благослови, и благополучно начати и спешно кроме всякаго препятия во славу Твою совершити, яко всесильному Царю молимтися, услыши и помилуй.

Во всем споспешествуяй всем во благое, Господи, милостивно и рабом твоим (или рабу Твоему) имярек, поспешествуй, Спасе, и во благополучное совершение делу их (или его) спешно произвестися, благослови, молимтися, всемогий Владыко, услыши и помилуй.
Ангела Твоего Хранителя пристави делу сему, благоуветливе Господи, и еже воспятити вся препятия видимых и невидимых врагов, поспешство же во всем ко благополучному совершению делающым сотворити, молимтися, преблагий Спасе, услыши и помилуй.

​​​​​​​Во славу Твою вся творити повелевая, Господи, рабом Твоим (или рабу Твоему) имярек, ко Твоей славе дело свое начинающым, благословением твоим поспешество благополучное с довольством к совершению подаждь, здравие им (или ему) со благоденствием даруя, молимтися, Вседаровитый Творче, услыши и помилуй.
Об умирении родителей и чад, во вражде сущих

Господи Боже наш, Иже возлюбленным Твоим Отроком, Господем же нашим  Иисусом Христом чада назвавый  ны Божия, сыноположением и благодатию Всесильнаго и Всесвятаго Духа Твоего, рекий: Аз буду Ему во Отца, и Той будет Мне в Сына. Сам, Человеколюбче Царю, призри от святаго Жилища Твоего на  рабы Твоя: родители (имярек), и чада их (имярек), овыя в скорби, ины же во озлоблении пребывающия; сия чада и родители, яко Сам Отец наш еси, отчески умири, примири, вразуми, миром Небесным утеши, нас же и их услыши и помилуй.

Святым пророком Твоим Моисеем на горе Синае заповедь давый чтити родители своя, яко и Сам бо Родитель нам еси; от сего всяк сын же и всякая дщерь Твой образ на отце и матери своей почитати да научени будут. Мы же, с умиленный сердцем, всеблагую Мати Твою в помощницу призывая, вопием Ти: растоящиеся от друг от друга кознями и завистию сатаниною рабы Твоя (имярек чад), во вражде с родителями своими (имярек) пребывающие примири, их же и нас любовию Твоею утверди, помысли смиренномудрия одари, гнев и вражду утиши, молив Ти ся услыши и помилуй.
​​​​​​​
Господи, наш Господи! Святым апостолом Твоим Павлом Ефесян учивый родители не раздражати чада своя, но в назании и страсе Господнем воспитовати их, да прославят и вознесут Имя Его Единого  и усты целомудренными и делы благими; вразуми и умири во вражде сущих (имярек родителей) со чады их (имярек чад), яко раби Твои есмы, паже же от гнева, превознозношения, гордыни, себялюбия возведи и возвеличи их миром Твоим и любовию к Тебе, Господу нашему во умилении мольбы приносим: скоро услыши и милостивно помилуй.
О пребывающих под следствием и осужденных

Избавлей нища от сильна, и убога, емуже несть помощника, в бедах и заточении и во узах сущыя, яко щедр милостивно посети, прилежно молим Ти ся, скоро услыши и яко Щедр помилуй. Хор: Господи, помилуй.

​​​​​​​Иосифа в темнице иногда в Египте заключеннаго преславно свободивый, и ныне нами Тебе призывающыя раб Твоих (имярек) в заключении находящихся от пагубы, озлобления и горькия беды избави, молим Ти ся, избавителю Милостивый, услыши и скоро помилуй.
 Петра от уз и темницы изведый, и невредна Церкви Твоей представивый, Христе, и рабов Твоих (имена) в заключении пребывающих в покаянии Тя призывающих и нами Тебе ныне молящихся, яко милосерд помилуй, и от уз свободи , молим Ти ся , Всемилостивый Спасе, услыши и помилуй.
Об обретении спутника жизни

Господи Боже наш, Ты рекл пречистыми усты Твоими: не добро быти человеку единым, и пречистыми рукама Своима, ими же Небеса утвердишася и земля основася, создал еси ему помощника; преблагословенный же апостол Твой Павел глаголет, яко жене спасение есть чрез честное супружество и чадородие. Воспоминая же сие ныне, смиренно молим Тя: благослови рабе Твоей (имярек) супруга и спутника в житии сем и чаемом пребывании будущем; спутника, — егоже Сам веси, и утверди их в союзе мира, единомыслия, верности, благочестия и любви, молим Тя, многомилостиве Господи, услыши и помилуй.

Якоже Исааку, отроку патрираха Аврааама, в Средоречии уневестил и обручил жену Ревекку, тако и ныне соедини и обручи союзом любви и мира рабу Твою (имярек), верному рабу Твоему, егоже Ты Сам среди многих веси: ангел же Твой да пръидет пред ними вся дни живота их: благодатию Божиею умирит, укор лукавых и завистливых человек и козни бесовския да отженет Он от них; и низложит Силою Твоею, — Господи, молимся Ти, Человеколюбче, Творче: вонми и милостивно помилуй.

Милостиве Господи, да не по своей воле, или во угождение страсти оставит человек отца своего и матерь свою, но по всеблагому смотрению Твоему да устроится брак рабе Твоей (имярек), да снизойдет благословение Твое Вышнее на союз ея, да пребудет благословляющая Десница Твоя с рабою Твоею (имярек) и всякими праведными деяниями и начинаниями супружества сего; да прославит и вознесет она Имя Твое Святое вся дни живота своего, молимя Ти, чистаго брака Священнодействителю, и телеснаго
​​​​​​​Законоположителю, нетления Хранителю, житейских нужд благий Устроителю, скоро услыши и милостивно помилуй.
Об обретении спутницы жизни

Господи Боже наш, Ты рекл еси пречистыми усты Твоими: не добро быти человеке единому, и пречистыми руками Своими, ими же небеса утвердишися и земля основася, создал еси ему помощника. Воспоминая ныне сие, смиренно молим Тя: благослови рабу твоему (имярек) спутницу, еяже Сам веси, и утверди их в союзе мира, единомыслия, верности, благочестия и любви, молим Тя, Многомилостиве Господи, услыши и помилуй.

Якоже Исааку, отроку патриарха Авраама, в Средоречии уневестил и обручил жену Ревекку, тако и ныне соедини и обручи союзом любви и мира вернаго раба Твоего (ямярек), рабе Твоей, еяже Ты веси, и ангел Твой да предъидет пред ними вся дни живота их: благодатию Божиею умирит, укор лукавых и завистливых человек и козни бесовския да отженет Он от них; и низложит Силою Твоею, — Господи, молимя Ти, Человеколюбче Творче: вонми и милостивно помилуй.

​​​​​​​Милостивый Господи, да не в свою волю оставит человек отца своего и матерь свою, и прилепится жене своей, но да снизойдет благословение Твое Вышнее на союз сей, да пребудет благословляющая десница Твоя с рабом Твоим (ями рек) и чадами его, и всякими праведными деяниями и начинаниями его; да прославят и вознесут они Имя Твое Святое вся дни живота своего, молим Ти, чистаго брака Священнодействителю, и телеснаго Законоположителю, нетления Хранителю, житейских нужд Благий Устроителю, скоро услыши и милостивно помилуй.
Об умножении любви и искоренении вражды и злобы

Господи Боже наш, милостива, яко Благ презри на иссохшую в любви землю сердец рабов  Твоих (имярек) тернием ненависти, самолюбия же и несчетных беззаконий люте оледеневшую, и каплю благодати Пресвятаго Духа Твоего испустив, богато ороси ю, во еже плодоносите и возрастите от горящих к Тебе Любве, всех добродетелей корень — страх Твой;  и искренняго спасения неленностное попечение, всех же страстей и многообразных лукавст и лицемерия искоренение. Прилежно, яко Благодетеля всех молим: скоро услыши и человеколюбия помилуй.

Заповедь новую Твоим учеником, еже любити друг друга, давый, Владыко, обнови сию благодати Пресвятого Духа действительно в душах и сердцах рабов Твоих (имярек), да николиже о своих сии, но всегда о Твоем благоугоодии, и искреннего спасении и пользе попечение творити потщатся, молим Ти ся, Благодетелю Милостивый: скоро услыши и милостивно помилуй.

​​​​​​​Сие в сердца рабов Твоих (имярек) любовь силою благодати Пресвятага Духа всели, Всещедрый Господи, еже не точию братию и други, но и врагов наших по Твоему Божественному повелению истинно любити и о спасении их искренно тщатися: молим человеколюбия Пучину Твоего милостиво помилуй.

Об умножении любви в браке

Еще молимся, да хранят люди твои заповедь сию: еже Бог сочета, человек да не разлучает, и даруется домашним их церквам несокрушимая крепость и преспеяние в любви нелицемерной.

Еще молимся о сохранении супружества рабов Твоих в мире и единомыслии, благочестии и чистоте.

​​​​​​​Еще молимся, да взвеселится люди Твои видением сынов и дщерей, и да умножится народ наш и благословение Твое наследуется в нем в род и род.
О даровании чад безчадным супругам

Боже Превечный и всея твари Содетелю, ребро праотца нашего Адама Твоим человеколюбием в жену преобразивый и благословивый их, и рекий: растите и множитеся и обладайте землею. Молимся Ти, о еже даровати рабом твои (имярек) благочадие восприятию и незазорному пребыванию, целомудрию и плоду чрева на пользу и вся яже ко спасению пропения даровати им; во умилении сердец молимся и вопием: Сам Господи благослови, милостивно помилуй.

Господи, Господи во умилении сердец зовем Ти: предстательством Твоим обручивый, славою и честию венчавый рабов Твоим (имярек), подаждь им житейский благ, Благий Устроителю. Житие мирно, целомудрие, семя долгожизненное, о чадах благодать, неувядаемой славы венец, молимся Благости Твоей: исполни во благих прошение рабов Твоих, и милостивно помилуй.

​​​​​​​Еще молимся Тебе, Отцу и Сыну и Святому Духу, Троице Единосущней и Нераздельней, во еже благословити рабов Твоих (имярек): даждь им плод чрева, доброчадие: возвыси их, яко кедры ливанстии, яко лозу благорозную, и семя класяно; и да узрят они сыны сынгов своих, яко новосаждения масличная, окрест трапезы своея и воссияют, яко светила на небеси, в Тебе Господе нашем; во умилении молимся: скоро услыши и милостивно помилуй.
Об избавлении страждущих от недуга пьянства, курения и употребления смертоноснаго зелия

Еще молимся Тебе, Господу Богу нашему о еже услышати глас молений нас грешных и помиловати рабов Твоих (имярек) — болящих, страждущих, одержимых недугом пьянства, и имущих пристрастие к употреблению смертоноснаго зелия и курения. Послати им в злотраданиях терпение, облегчение, избавление от присратий сих молим Ти ся всяких исцелений Источниче, Владыко Господи, скоро услыши и милостивно помилуй.

Еще молимся Тебе Всемилостивому Спасителю, скорому помощнику: скорое свыше покажи посещение болящим, страждущим, одержимым недугом пьянства и имущим пристрастие к употреблению смертоносного зелия и курению рабом Твоим (имярек). Пощади и помилуй их, Господи, избави их от страстей и горьких болезней; благословив укрепи их, яко благосерд прости им вся согрешения вольная и невольная и скоро воздвигни их от пути погибели, молим Ти ся услыши и помилуй.

​​​​​​​Призри Владыко Человеколюбче милостивым оком Твоим на рабов Твоих, страждущих от недугов пьянства и употреблени смертаностного зелия и курения (имярке). Вразуми их, Господи, омраченных умом, уврачуй недугующих, утверди их в благоразумии, укрепи в покаянии; да не обладает ими уныние, и ропотливость, но да имут заботу о спасении душ и телес и трезвенно поживут во славу Твою во благоденстивии, на пользу свою и благо ближних, во всяком благочестии и чистоте. Молим Ти ся, Всемогущий Владыко: услыши и помилуй.
Иные прошения для избавления от недуга пьянства и курения

Призри Господи милостивно на рабы Твоя (имярек), порабощенныя пагубною страстию, даруй им познати сладость воздержания и произрастающих от него плодов духовных, молим Ти ся, услыши и помилуй.

О еже пощадити рабов Твоих (имярек) и простити им всякое прегрешение вольное и невольное, показати на них великую твою милость, избавити от греховнаго пленения и насилия дьявольского, молим Ти ся, услыши и помилуй.

О еже не умрети рабом Твоим (имярек) лютою смертию, но оживотворитися Кровию Твоею честною и исцелитися от горести, еюже их сопротивни напои, молимся Тебе Врачу души и телес, услыши и милостивно помилуй.

​​​​​​​Яко бесноватага страны гадаринския, божественно силою от насилия диавольскаго свободивый, исцели рабов твоих (имярек), люте страждущих, молим Ти ся, услыши и помилуй.
Об обращении в сектах заблудших

Всвеблагий и Милостивый Владыко, не хотяй смерти грешных, но ожидаяй обращения и покаяния и хотящий всем человеком спастися и в познание Истины прийти; соедини во Святей Твоей Церкви рабов Твоих, заблуждших (имярек), помраченных и скитающихся в терниях суеты, страстей, сект, ересей и расколов; противящихся Евангельской Твоей истине и  отпавших от достояния Твоего, молимся Тебе: яко Благ, помилуй.

Утвердивый мир сей во славу Твою, сотвори да и с нами, истинною верою и правоверным благочестием рабы Твои заблуждишия (имярек) в покаянии прославят Тебе, Бога Истиннаго, и Пречистую Твою Матерь, и святых Твоих велемудрых; да отпадут они ересей злохитрых, и тины заблуждений, сект и расколов пагубы, и милости Твоея обетование наследуют, молимся Ти, Всесильне Творче, Господи, услыши и помилуй.

​​​​​​​Давый заповедь Твою нам, о еже любити Тебе, Бога нашего и ближняго своего, сотвори с нами да ненависть, вражды, обиды, расколы, секты, и ереси прекратятся; архипастыри же и пастыри в христиаанском благочестии и правоверии, и в святоотческих преданиях да утвердятся; раби же Твои, отпадшия от Святыя Кафолические Православныя Церкви (имярек), к матери-Церкви в покаянии приидут и во исповедании Тебе, Бога нашего прославят, молимся Ти, Вседаровитый Человеколюбче Господи, заступи, спаси, просвети, освяти и милостивно помилуй.
Об обращении от правой Веры отступивших

Всемогущий Владыко, Премудрый и Всеблагий Господи, умиленно молимся Ти о еже вразумити рабов Твоих (имярек), яко преступивших заповеди Твоя и заблудивших от истиннаго пути Твоего и творения Заповедей Твоих. Прибегаем благодати Твоей, юже аки твердое упование надежды имуще и молим Тя: согрешихом, очисти, Господи; беззаконовахом, прости, Владыко; прогневахом Тя, помилуй, Долготерпеливе и сохрани прочее: ум, совесть и сердце наше от скверн мирских. Избави и спаси ны от многомятежныя бури страстей и грехопадений вольных и невольных, ведомых и неведомых и в тихое управи пристанище веры, любви и надежды жизни вечныя. Тебе же молим, Премилостивый Господи: услыши и просветив, помилуй.

Еще молим Тя, Единородный Сыне и Слове Божий, о еже просветити ум, оживити совесть, исправити и обновити сердца рабов Твоих заблжудших (имярек), да отныне не пребывают в заблуждениях от плоти, мира и диавола в средца их всеваемых. Святе святых, простри руку Твою невидимую от святаго Жилища Твоего и исхити их от пути погибельнаго, о них же ныне молимся Ти. Даруий им, Господи, умиление и велию милость, во еже ходити во истине Твой. Молим Ти, Отче щедрот и всякаго всепрощения: услыши и отечески помилуй.
Премудрый Владыко и Всеблагий Господи, Спасителю наш, призри милостивно на рабов Твоих заблуждших (имярек) и не помяни беззаконий их и наших, но по безмерному благоутробию Твоему прости им и нам вся прегрешения, яко преступающим заповеди Твоя и удаляющимся на страну далече, но не отметающихся от Тебе, Всемилостиваго Отца. Помяни немощь естества нашего, и повсюду обдержащия искушения врага, и прелести, и соблазны мира. Сам, Господи, очисти и спаси нас от пути погибели, просвети умы наша, еже непоколебимо веровати в Тя; подвигни сердца наша, еже всецело любити Тя; направи стопы наша, еже непреткновенно ходити во свете заповедей Твоих. Сотвори, Господи, да в преподобии и правде поживем вся дни живота нашего. Молимся Тебе, Творцу и Искупителю: скоро услыши, направи и помилуй.
Об избавлении в бесовских обстояниях сущих

Еще молимся Тебе, Всемогущей, Животворящей и Нераздельней Троице, смиренно припадая, о еже помиловати рабов Твоих (имярек), призри на них и на всех нас милостивым оком Твоим прости им вся множество прегрешений вольных и невольных, виждь скорбь и озлобление. Вселестное сатанинское мечтание, привидение жи и страхование и всю мучительскую силу, обдержащую  рабов Твоих, отжени; дав мир им Свой, покрый их человеколюбием и благостию Своею, соблюди их во всяком благочестии и чистоте от всякаго озлобления, насилия, мучения, наваждения же и нападения диальвоскаго. Здравие же душевное же и телесное подаждь им, молим Тя, Всещедрая Троица: моления наша услыши и помилуй.

Еще молимся Тебе, Господу Богу нашему, о еже услышати глас молитвы нашея и пощадити и помиловати рабов Твоих (имярек), и показати на них великую Свою милость, и отвратити всякий гнев Свой, праведно движимый на них; еже простити им все множество прегрешений и избавити их от всякаго обстояния, насилия же и мучительства лукаваго диавола, и прогнати от них вселестное сатанинское мечтание, привидине же и страхование, и всю его мучительскую силу, обдержащую их; здравие же душевное и телесное скоро подати им благости Своею и помиловати их и всех нас рцем: Господи, скоро услыши и милостивно помилуй.

​​​​​​​Еще молимся Тебе Владыце нашему, о еже исцелити и избавити рабов Твоих (имярек) от настоящия беды и неможения, скорби и содержащия пагубы; о избавлении страждущих чрез лукавых человек от злодеяний бесовских; вошебными обавании, потворами, чародействы, колдовствами, волхвованиями, укорами и призором различных лукавых человек тем себе отдавших. О них же молимся Ти, Всемогущий и Всемилостивый Спасе наш, Господи: оскорбляющих Твоих рабов заступи, спаси и сохрани, а нас, непотребных рабов Твоих, благодатию Своею покрый и помилуй.
Об учащихся

Еще молимся Господу Богу нашему, о еже призрети милостивно на рабов Своих (имярек) и низпослати в сердца, во ум и во уста их Духа премудрости, разума же и благочестия, и страха Своего, и просветити их светом Своего богоразумия, и подати им силу и крепость, во еже скоро прияти и спешно навыкнути Божественнаго закона Его наказанию, и всему благому и полезному учению; еже преуспевати им премудростию и разумом, и всеми благими делы в славу Пресвятаго Его имени рабом Твоим, и даровати им здравие, и долголетны их сотворити к созиданию и славе Церкве Своея, рцем вси: Господи, услыши и милостивно помилуй.

Еще молимся Тебе, Господу Богу, о еже ниспослати на рабов Твоих сих (имярек) духа премудрости и разума, и отверзи им ум и уста, и просветити сердца их к приятию наказания добрых учений. Молим Ти ся всещедрый Господи: скоро услыши и милостивно помилуй.

​​​​​​​Еще молимся, о еже быти им рабом Твоих (имярек), премудростью и добродетельным житие, и благостоянием в Православней вере, радость и утешение родителям своим и Церкви Православней утверждение, молимся, всдаровитый Господи, скоро услыши и милостивно помилуй.
Об обретении работы и жилища

Господи Иисусе Христа, Сыне и Слове Божий! Ты рекл еси Пречистыми усты Твоими: просите и приимите. Молимся Ти, Единородный Сыне и Слове Божий: благослови рабов Твоих (имярек)  и исполни их всех благ Твоих — радости, веселия и всякаго благополучия. Молим Ти ся, Благодетелю Спасе наш: услыши, снизпосли, благослови и помилуй.

​​​​​​​Еще молимся Тебе, Благодетелю милостивому, о еже благословити благочестивое жительство рабов Твоих (имярек). Благоспосешство в обретении места труда со всяким довольством, обретение жилища для благочестиваго жительства в нем подати и приставити им Ангела Своего, Хранителя, еже невидимо отразитися всем противным вещем, видимым и невидимым врагом, и злым человеком, и духовом лукавым. Благопоспешство, мудрость же и силу благодатию Пресвятаго Духа подаждь им, молимся Ти, Господи, услыши и помилуй.
О подследственных и осужденных

Избавлей нища от сильна, и убога, емуже несть помощника, в бедах и заточении и во узах сущыя, яко щедр милостивно посети, прилежно молим Ти ся, скоро услыши и яко Щедр помилуй.

Иосифа в темнице иногда в Египте заключеннаго преславно свободивый, и ныне нами Тебе призывающыя раб Твоих (имена) в заключении находящихся от пагубы, озлобления и горькия беды избави, молим Ти ся, избавителю Милостивый, услыши и скоро помилуй.

Петра от уз и темницы изведый, и невредна Церкви Твоей представивый, Христе, и рабов Твоих (имена) в заключении пребывающих в покаянии Тя призывающих и нами Тебе ныне молящихся, яко милосерд помилуй, и от уз свободи , молим Ти ся , Всемилостивый Спасе, услыши и помилуй.
Об избавлении от недоброжелателей и об обретении работы и жилища

Господи, Иисусе Христе, Сыне и Слове Божий! Ты рекл если пречистыми усты Твоими: просите и приимите. Молимся Ти Единородный Сыне и Слове Божий: благослови рабов Твоих (имярек) и исполни их всех благ Твоих — радости, веселия и всякого благополучия. Молимся Ти, Благодетелю, Спасе наш: услыши, ниспосли, благослови и помилуй.

Творче и Создателю всяческих, Боже, благочестивое жительство рабов Твоих (имярек) к славе Твоей благословением спешно исправи, избави иступления, жестокости и злобы, подай ум здрав, целомудр, помысл, сердце трезвящееся и вразумление. Молимся Ти Вседаровитый Творче услыши, вразуми и помилуй.

​​​​​​​Еще молимся Тебе благодетелю милостивому о еже благословити благочестивое жительство рабов Твоих (имярек):  влагопоспешити в обретении места труда, жилища для благочестиваго жительства; преставити им ангела Своего хранителя; невидимо отрази вся противныя вещи, враги видимыя и невидимыя и духи лукавыя. Благопоспеши подати мудрость и силу благодати Пресвятаго Духа, молимся Ти, Господи, услыши и помилуй.
Об избавлении от морового поветрия (эпидемии)

Еще молимся Тебе Господу Богу нашему о еже милостивно пощадити нас от губительнаго поветрия на ны движимаго и избавити верныя люди Твоя от смерти душевныя и телесныя, недугующим исцеление и здравие подати, нам же всем Твое божественное ограждение и заступление, молим Тя, милосердый Господи, услыши и милостивно помилуй

​​​​​​​Еще молимся о еже умирити смятение человек и страхования всяческия упованием твердым оградити верных Своих, мир же и тишину вселити в сердца наша, молим Ти ся, Господи, услыши и помилуй.
Благодарственное молебное пение день Великой Победы (9 мая)

Еще молимся, о еже прияти Господу Спасителю нашему исповедание и благодарение нас,
недостойных рабов Своих, яко не по беззаконием нашим сотворил есть нам, ниже по грехом нашим воздал есть нам, но и в годину искушения, пришедшаго на Отечество наше и на всю вселенную, избавил ны есть, и внегда, обышедше, обыдоша нас врази наши, явил есть нам спасение Свое.

Еще молимся о вождех и воинех наших, на поли брани жизнь свою положивших,
от ран и глада скончавшихся, в пленении и горьких работах невинно умученных и убиенных, и всех Победы ради потрудившихся, яко да даст им Царь славы в день праведнаго Своего воздаяния жизнь вечную и венцы нетления, нас же всех в вере и единомыслии утвердит.

​​​​​​​Еще молимся Тебе Господу, Богу нашему, о еже призрети на, скорби, беды, страдания, слезы и стенания людей Своих, и Милостиву быти и отвратити весь гнев Свой, праведно движимый на ны, и помиловати ны.
Об утешении скорбящих и в обстоянии сущих

Еще молимся Тебе, Человеколюбцу Спасителю нашем: едине благоутробне, едине щедре и милостиве, избави рабов Твоих (имярек) от настоящия скорби и печали и обдержащия пагубы; исхити, многоблагоутробне, нас недостоных ныне вопиющих Ти, обурчевания многого и лютага; претвари, Владыко, печаль и скорбь в радость о Тебе и делех Твоих, молимся Ти: услыши и помилуй.

Господи, слезы и скорбь вдовы наинской о сыне ея единороднем умершем радость воскрешением его ей приложивый, исполни веселия и радости о Боже рабы Твоя (имярек). Во умиления приносимыя Ти мольбы приими, всеблагий Царю, и яко щедре Матию Твоею прости им всякое согрешение вольная и невольная; утверди ниспадающих, сущих в скорби и во всяком обстоянии, молимся Тебе Боже наш: скоро услыши и милостивно помилуй.
Всещедрый Господи Иаиру печаль о дщери его умершей и сотнику скорбь о умершем отроке его утешивый воскрешеним их. Ниспосли и рабом Твоим (имярек) утешение посещением их Святым Твоих Духом, скорби утеши, от обстояния избави рабов Своих к Тебе, источнику радости Вописющих и милостивно помилуй.
О единстве Церкви Русския

Еще молимся Тебе, Богу, Спасителю нашему, о еже милостивым оком призрети на ны, и о еже сохранити и нам веру православную невредиму и непреобориму от расколов, ересей, неверия и всех наветов вражиих, рцем вси, Милосерде Господи, услыши и помилуй.

Еще молимся Господу Спасителю нашему, о еже приятии исповедание и благодарение нас, недостойных рабов Своих, о благодеяниях, яже излиял еси на Церковь Русскую от лет древних, спасая ю от бед и скорбей и от разделений восставляя, и припадаем, и славословие Тому, яко Богу приносим и умиленно вопием: яко Милостив, исполни во благих прошения наша, прилежно молим Ти ся, Всесильный Творче, услыши и помилуй.
Еще молимся, о еже приятися, яко кадилу благовонному, молитвам сонма мучеников и исповедников за веру и правду страшныя страдания и мученическую кончину претерпевших и Христа ради в годы гонений подвизавшихся, да Церковь Русскую утвердит, нас же всех в единомыслии соблюдет, рцем вси Господи, Спасителю наш, услыши и милостивно помилуй.

​​​​​​​Еще молимся Тебе, Господу Богу нашему, о еже благосердием и милостию призрети на Церковь Свою и сохранити ю от всех наветов вражиих, о еже и в предняя лета даровати наследию Твоему мир и безмятежие, да не умалится и не поколеблется Русь святая, и да славится в ней Трисвятое имя Твое, рцем вси, Благосерде Господи, услыши и милостивно помилуй.

Во время долгих дождей (ливней, непогоды)

О еже помянути Завет Свой, иже к Ною, и не растлити безгодною мокротою, и мрачным злорастворным воздухом, и темною мглою землю, и нищих людей Своих; но милостивно пощадити достояние Свое, и солнцу плодоносными лучами и мерною теплотою возсияти на земли повелети, Господу помолимся».

О еже повелети облаком престати от безгоднаго дождя, и мраком разъитйся, светлости же солнечной возсияти, Господу помолимся.

О еже пощадити люди, и скоты, и всю землю сию, и не растлити ю безгодным дождевным лиянием, Господу помолимся.

О еже подати благорастворенное ведро достоянию Своему, и умножити плоды земныя, Господу помолимся.

О еже не по грехом нашым воздати нам, и казнити нас; но по велицей милости Своей, и по многим щедротам Своим, явити на нас скорое Свое человеколюбие и благость, Господу помолимся.

О еже не растлити плоды и семена земная грех ради наших, безгодным дождевным лиянием; но вольным ведром пощадити и угобзйти я нищих ради людей Своих, Господу помолимся.

​​​​​​​О еже благоприятным быти молитвам нашым, и избавити нас от глада, губительства, труса, потопа, огня, града, меча, нашествия иноплеменник, междоусобныя брани и всякия смертоносныя язвы, Господу помолимся.
О сохранении творения Божьего

Сотворивый мир и вся, яже в нем, Господи, приими покаяние наше и во время потребно посли земли дождь и благорастворение воздухов, умири стихии, да грех наших ради не мучается и страждет тварь, молим Ти ся, услыши и милостивно помилуй.

Делом гордых противящийся, Господи, дела рук наших исправи, да не обратятся на главы наша и не погубят ны, но призри на смирение наше и низпосли благодать и мир, молим Ти ся услыши и милостивно помилуй.

Да не страждет лихоимств и беззаконий ради наших творение Твое, Господи, но да сохранится неврежденно от всех навет вражиих, молим Ти ся, услыши и милостивно помилуй.

Еще молимся о еже не помянути беззаконий и неправд людей Своих, и отвратити от нас весь гнев Свой, праведно на ны движимый, и не погубити мир сей гладом, жаждею и иными бедами, но сохранити его, и нас пощадити, молим Ти ся, услыши и милостивно помилуй.

​​​​​​​Иже от бури морския спасый ученики Твоя, Господи, запрети бури и ветром, утверди основания земли, молим Ти ся, услыши и милостивно помилуй.
Во время губительных бедствий и техногенных катастроф

Иже от бури морския спасый ученики Твоя, Господи, запрети бури и ветром, утверди основания земли, молим Ти ся, услыши и милостивно помилуй.
Сотворивый мир и вся, яже в нем, Господи, приими покаяние наше и во время потребно посли земли дождь и благорастворение воздухов, умири стихии, да грех наших ради не мучается и страждет тварь, молим Ти ся, услыши и милостивно помилуй.

​​​​​​​Делом гордых противящийся, Господи, дела рук наших исправи, да не обратятся на главы наша и не погубят ны, но призри на смирение наше и низпосли благодать и мир, молим Ти ся услыши и милостивно помилуй.
Во время губительных поветрий и смертоносной заразы

О еже не помянути беззаконий и соблазнов нас, грешных и недостойных рабов Своих, но милостивно очистити грехи наша, и отвратити гнев Свой, праведно движимый на ны, Господу помолимся.

О еже не яростию Своею обличити, ниже гневом наказати нас, но помянути, яко плоть есмы, дух ходяй и не обращаяйся, и милостивно пощадити от смерти души наша, Господу помолимся.

О еже не внити в суд с рабы Своими, и не назрити беззакония наша, но очистити я, и милостиву быти, и пощадити люди согрешшия, Господу помолимся.

О еже помянути щедроты и милости Своя, яко от века суть, грехов же юности и неведения нашего не помянути, и помиловати нас, Господу помолимся.

О еже услышати от храма Святаго Своего глас наш, и исцелити болезни смертныя, одержащия нас, и потоки беззакония, смутившия нас, изсушити, Господу помолимся.

О еже вскоре изъяти нас от сетей смертных, и от болезней адовых избавити, Господу помолимся.

О еже милостивно продолжити рабом Своим покаяния время, и не безгодно, яко неплодную смоковницу, посещи, но благосердием окопати, и милосердия росою напоити, плодов покаяния и обращения нашего человеколюбно еще ожидая, Господу помолимся.

О еже вознести нас от врат смертных, и меч изъятый, и лук Свой напряженный, и в нем сосуды смертныя, на ны праведно уготованныя со стрелами горящими, милостивно (да не погибнем) от нас отвратити, Господу помолимся.

​​​​​​​О еже услышати молитву нашу, и моление наше внушити, и слез наших не премолчати, но ослабити нам, да почием прежде даже не отъидем, и ктому не будем, Господу помолимся.
Во время наводнения

О еже не в гневе прещения Своего погубити нас грех ради и беззаконий наших, но милости и щедроты Своя от века сущыя помянути, и помиловати нас, Господу помолимся.

О еже не по грехом нашим воздати нам, ни по беззаконием нашим наказовати нас, но по велицей милости Своей и по многим щедротам Своим, явити на нас скорое Свое человеколюбие и благость, Господу помолимся.

О еже помянути Завет Свой, иже к Ною, и не погубити нас безгодною влагою, и бурным ветров дыханием, но милостивно пощадити достояние Свое и належащую бурю (морскую), и смятение воздуха укротити, и ветром дати временное и мирное дыхание, Господу помолимся.

​​​​​​​О еже милостивно услышати глас молитвы нашея, и избавити нас от глада, губительства, труса, потопа, огня, града, меча, нашествия иноплеменник, междоусобныя брани, и всякие смертоносныя язвы, Господу помолимся.
Во время бездождия

Не хотяй смерти грешнаго, но ожидаяй обращения и покаяния его, услыши нас, Тебе молящихся.

Возводяй облаки от последних земли, повели тем подати дождь мирен на ню, молим Ти ся.
Призываяй воду морскую и изливаяй ю на лице всея земли, низпосли благословение Твое на ны, молящияся Тебе.

Одеваяй небо облаки, и уготовляяй земли дождь, низпосли нам милости Твоя, молящимся Тебе. Прозябаяй траву скотом и злак на службу человеком, спаси человеки со скоты, Тебе молящияся.

​​​​​​​Дождь волен и тучу мирную подаждь земли, и спаси всяческая, Человеколюбче, и нам, молящимся Тебе. Низпосли дожди Твоя на требующая и просящая места, Человеколюбче, нам, молящимся Тебе.
Заупокойные прошения на панихиде и литии

Еще молимся о упокоении душ усопших рабов Божиих (имярек) и о еже проститися им всякому прегрешению, вольному же и невольному.

Яко да Господь Бог учинит души их, идеже праведнии упокояются.
Милости Божия, Царства Небеснаго и оставления грехов его их у Христа, Безсмертнаго Царя и Бога нашего, просим.

​​​​​​​Молитва: Боже духов и всякия плоти, смерть поправый и диавола упразднивый, и живот мiру Твоему даровавый: Сам, Господи, упокой души усопших раб Твоих (имена), в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное ими словом, или делом, или помышлением, яко благий человеколюбец Бог, прости, яко несть человек, иже жив будет и не согрешит. Ты бо Един кроме греха, правда Твоя правда во веки, и слово Твое истина.
Возглас: Яко Ты еси воскресение и живот, и покой усопших раб Твоих (имена), Христе Боже наш, и Тебе славу возсылаем, со безначальным Твоим Отцем, и пресвятым и благим и животворящим Твоим Духом, ныне и присно, и во веки веков. Аминь.
Молитвы для особых случаев (читаемые священником)
Молитва на освящение всякой вещи

Созда́телю и Соде́телю челове́ческаго ро́да, Да́телю благода́ти духо́вныя, Пода́телю ве́чнаго спасе́ния, Са́м, Го́споди, посли́ Ду́ха Твоего́ Свята́го с вы́шним благослове́нием на ве́щь сию́, я́ко да вооруже́на си́лою небе́снаго заступле́ния хотя́щим ю́ употребля́ти, помо́щна бу́дет к теле́сному спасе́нию и заступле́нию и по́мощи, о Христе́ Иису́се Го́споде на́шем. Ами́нь.

И кропит вещь святой водой трижды
Молитва перед хирургическим действием (перед операцией, перед хирургическим вмешательством)

Владыко Вседержителю, Святый Царю, наказуй и не умервщляй, утверждай и возводяй низверженныя, телесныя человеков скорби исправляй, молимся тебе, Боже наш раба твоего (имярек) немощствующа посети милостию Твоею, прости ему всякое согрешение вольное и невольное. Ей Господи, врачебную Твою силу с небес низпосли еже управити ум и руку раба Твоего лекаря да нуждную хирургию сотвори благополучно, яко телесному недугу больнаго раба Твоего (имярек) совершенно исцелитися, и всякому нашествию неприязненному далеко отгнану быти от него. Воздвигни его от одра болезненного и даруй его здрава душею и телом церкви Твоей благоугождающа и творища волю Твою. Твое бо есть еже миловати и спасати ны, Боже наш и Тебе славу возсылаем Отцу, и Сыну и Святому Духу ныне и присно, и во веки веков. Аминь
Молитва об учащихся

Господи, Боже и Создателю наш, образом Своим почтый нас человеки, научивый избранныя Твоя, яко дивитися внемлющым учению Твоему, открывый премудрость младенцем; иже Соломона и всех взыскующих премудрости Твоей научивый, отверзи сердца, умы и уста рабов Твоих сих, во еже прияти силу закона Твоего, и со успехом познати преподаемая им полезная учения, в славу Пресвятаго имене Твоего, в пользу и созидание Святей Твоей Церкви, и разумети благую и совершенную волю Твою. Избави их от всякаго налога вражия, соблюди их в Православии и вере, и во всяком благочестии и чистоте во вся дни живота их, да преуспеют в разуме и во исполнении заповедей Твоих; да тако предуготовани прославят Пресвятое имя Твое, и будут наследницы Царствия Твоего. Яко Ты еси Бог силен в милости, и благ в крепости, и Тебе подобает всякая слава, честь и поклонение, Отцу, и Сыну, и Святому Духу, всегда, ныне и присно, и во веки веков, аминь.
Молитва об неудобь учащихся

Господи Иисусе Христе, Боже наш, вселивыйся в сердца двунадесятих апостолов Твоих, нелицемерно благодатю Всесвятаго, сошедшаго ввиде огненных язык, и сих устне отверзый и начаша глаголати инеми языки; Сам, Господи Иисусе Христе, Боже наш, ниспосли того Духа Твоего Святаго на отроча сие (имярек), и насади Его во удеса сердца его Священное Писание, яже рука Твоя пречистая на скрижалех начерта, законоположнику Моисею ныне, и присно, и во веки веков. Аминь.

Молитва о в темницах и заточении сущих

Господи Иисусе Христе, Боже наш, святаго апостола Твоего Петра от уз и темницы без всякаго вреда свободивый, приими свмиренно молим Ти ся, жертву сию молитвенно во оставление грехов рабов Твоих (имярек), в темницу всажденных, и тех всесильною десницею Твоею от всякаго злаго обстояния избави и на свободу изведи. Аминь.
Молитва на благословение вай

Господи Боже наш, седяй на херувимех, возставивый силу Твоего Сына, Господа нашего Иисуса Христа, да спасет мир Крестом, и погребением, и воскресением Своим: Егоже и ныне пришедша во Иерусалим на вольную страсть, людие седящии во тьме, и сени смертней, приемше воскресения знамения, ветви древес, и ваиа финик, воскресение знаменующе сретоша. Сам Владыко и нас по подражанию онех, в предпразднственный сей день, ваиа и ветви древес в руках носящих соблюди и сохрани. Да якоже онии народи и дети осанна Тебе приношаху, и мы такожде в песнех и пениих духовных, животворящаго и тридневнаго Воскресения достигнем, в томже Христе Иисусе Господе нашем: с Нимже благословен еси, с Пресвятым, и Благим, и Животворящим Твоим Духом, ныне и присно, и во веки веков, аминь.
Молитва на освящение мясных яств (блюд, снеди)

Призри Господи Иисусе Христе, Боже наш, на брашна мяс, и освяти я, якоже освятил еси овна, егоже Тебе приведе верный Авраам, и агнца, егоже Тебе Авель во всеплодие принесе: подобне и тельца упитанного, егоже повелел еси сынови Твоему заблудшему, и паки к Тебе возвращшемуся: да якоже той сподобися Твоея благости насладитися, сице и освященных от Тебе, и благословенных насладимся в пищу всех нас. Ты бо еси истинная пища, и податель благих, и Тебе славу возсылаем со безначальным Твоим Отцем, и пресвятым, и благим, и животворящим Твоим Духом, ныне и присно, и во веки веков. Аминь.

Благословляется и освящается мясо сие окроплением воды сия священныя во имя Отца и Сына и Святаго Духа, аминь.
(Трижды).

Молитва на освящение сыра и яиц

Владыко Господи Боже наш, Зиждителю и Содетелю всех, благослови млеко огустевшее, с нимже и яйца, и нас соблюди во благости Твоей, яко да причащающеся их, Твоих независтно подательных даров исполнимся, и неизглаголанныя Твоея благости: яко Твоя держава, и Твое есть царство, и сила, и слава, Отца, и Сына, и Святаго Духа, ныне и присно, и во веки веков. Аминь.

Благословляются и освящаются сыр и яйца сии окроплением воды сия священныя во имя Отца и Сына и Святаго Духа, аминь.
(Трижды)

Молитва на освящение благовонного травного зелия

Господ Боже Вседержителю, словом твоим всячесая исполнивый, и возрастити повелевый земли вся плоды во своя времена, и давший я в радость и живот человеком: Ты Сaм, Всеблагий Владыко, и семена сия с различными зелиями принесенныя во святый хрaм сeй, благослови  Духов Твоим святым и рабов твоих сих, приемлющих зелия с семенами всякия скверны очисти и домы их всякаго благовония исполни, во еже быти сим и всем верою хранящим и кадящимся ими в соблюдение и избаву от всех вражиих прилогов и во изгнание всякого мечтания и действа диаволя находящего, дневнага и нощнага, на благословение же душам и телесем, верным твоим людем и скотом, домовом же и местом. Яко да вси приемлющие сие зелие, восприимут себе покров души и тел, и да будет нашему спасению врачевство твоея благости таинство: да в коем либо месте возложится, или на коем употребляемо будет, во еже получити благословение (вся противной силе оттуду прогнанней) десница Твоя до покрыет, во славу пресвятаго, великолепого и всепокланяемага Имени Твоего, Ему же подобает всякая слава, честь и поклонение, со Отцем, и Сыном, и Святым Духом, ныне и присно и во веки веков, Аминь.
Молитва для освящения соли

Боже Спасителю наш, пришедый по Иерехон при Елисеи пророце, и вредныя воды солию исцеливый, сам благослови и соль сию, и преложивый ю в жертву радования, Ты бо еси Бог наш, и Тебе славу возсылаем, Отцу, и Сыну, и Святому Духу, ныне и присно, и во веки веков, Аминь.
Молитва на благословение свеч церковных

Боже всемогущий, едине благий, и едине свете истинный, рекий пророку Твоему Моисею, да принесеши трапезу, и предложив предложение ея, внесеши светильник ко поставлению светила его. Темже убо прилежно, молимтися, да и сия по заповедем свещы верными рабы Твоими предуготовленныя в освещение и украшение святой трапезы Твоей, и в славу величества Твоего принесенныя милостивно приемлюще, человеколюбне росу благодати Пресвятаго Духа на ня изливый, благословити и освятити изволиши: и аз недостойный иерей, хотяй ко славословию трисияннаго Твоего Божества возженныя яве предложити, благословляю, и освящаю я, да вcu в святилище неприступныя Твоея Славы входящий, истинный правды Твоея видят свет, и великую Твою милость исповедующе, или я на пение хвалы Твоея приносящий, или тыяжде к осиянию благословенныя в домах хранящий в дне правды шествовати, хотения Твоя разумети, и оружием света одеяни и ненаветни, от всякия козни диавольския пребывающий, до невечерняго света Твоею помощию достигнути сподобятся. Яко благословен ecu во веки. Аминь.
Молитвы о даровании чад безчадным супругам

Услыши ны, Милосердый и Всемогущий Боже, и услышав моление наше, низпосли благодать Твою. Буди милостив, Господи, к молитве нашей, помяни заповедь Твою об умножении рода человеческаго, и буди милостивым Покровителем, да Твоею помощию исполнится Твое установление. Ты властною силою Твоею вся сотворил из ничего, и положил начало всему сущему в мире, сотворил и человека по образу Твоему, и союз супружества мужа и жены благословил и освятил еси. Призри, Милосердый Боже, на рабов Твоих сих имярек: союзом супружеским соединенных и умоляющих о Твоей помощи, да будет на них милость Твоя, да будут плодовиты, и да увидят они чада чад своих даже до третьяго и четвертаго рода, и до старости благой достигнут, и внидут в Царство Твое Небесное силою Господа нашего Иисуса Христа, Ему же подобает всякая слава, честь и поклонение со Отцем и Святым Духом во веки. Аминь.
Другая молитва о даровании чад безчадным супругам

Услыши ны милосердный и всемогущий Боже, да еже деется служительством нашим, сие исполнится Твоей благостью. Буди милостив, Господи, молениям нашим и воспамяни уставы Твоя, имиже умножение человеческого рода уставил еси, милостивне предстани, да еже Тобою сочетано бысть, сие Твоею помощью сохранится. Боже Преблагий, властию силы Твоя,  от несущих вся сотворивый, и всяких вещей начатки установивый, человека во образ Божий сотворивый, с неразлучною помощью жены, да телеси женскому даси от мужеска начаток, уча: никакоже разлучитися. Еже Богу от единаго установити подобаше. Боже наш, иже высокою тайную супружества союз, во еже им предзнаменовати тайну Христа с Церковью, соединение освятил еси:  имже невеста совокупляется мужу, и  дружество перве установленнное сицевим даруется благословением: еже самое токмо ни прародительным грехом, ниже потом Ноевым разорися. Сего  ради призри Милослорде на рабы Твоя сия (имярек) супружным союзом связанныя Твоего же прибежища и помощи просящия, да будет в них иго милости и мира и радования, и ничтоже в ни от дел их станах обрящет: да будут плодовитии и да узрят сыны сынов своих, да до третьяго и четвертаго рода, к вожделенной старости достигнут и внидут в Небесную скинию. Яко милостив и человеколюбец Бог еси, и Тебе славу воссылаем, Отцу и Сыну и Святому Духу, ныне и присно и во веки веков. Аминь.
Молитва об избавлении от недуга пьянства (или наркомании)

Владыко Господи, сотвориый человека по Образу Твоему и по Подобию, и Духа Святаго тому даровавый: избави падшее создание Твое от работы вражия, отверзи ему двери покаяния, ангела светла посли ему, избавляющая от всякаго навета вражия, Услыши, Боже, припадающих к тебе в скорби и печали и не отврати лица Твоего от одержимых пагубною страстию винопития [или наркомании], подаждь им крепость, надежду, веру, произволение благое утверди и приведи их ко спасительному воздержанию, попали терние согрешений вольных и невольных, да вселится в них благодать Твоя, просвещающая и очищающая всякаго человека. Исцели их от тяжкаго недуга пьянства [или наркомании], свободи от омрачения духовнаго и окаменения сердечнаго: даруй им здравие душевное и телесное, направи на путь трудолюбия и благочестия. Услыши, милостивый Господи, вопль родителей и сродников, плачущих о чадех и ближних своих. Твое бо есть еже миловати и спасати ны, Боже наш, и Тебе славу воссылаем, Отцу и Сыну, и святому Духу, ныне и присно, и во веке веков. Аминь.
Молитва во время распространения вредоноснаго поветрия (эпидемии)

Господи Боже наш, не вниди в суд с рабы Твоими, и огради нас от губительнаго поветрия на ны движимаго. Пощади нас смиренных и недостойных рабов Твоих в покаянии с теплою верою и сокрушеннием сердечным к Тебе милосердному и благопременительному Богу нашему припадающих и на милость Твою уповающих.

​​​​​​​Твое бо есть, еже миловати и спасати ны, Боже наш, и Тебе славу возсылаем Отцу и Сыну и Святому Духу, ныне и присно и во веки веков. Аминь.
Молитва миссионера

Го́споди, Го́споди! Положи́вый ду́шу Свою́ за спасе́ние все́х челове́к!
Я́ко Господи́н жа́твы Твоея́, изведи́ мно́гих де́лателей на жа́тву Твою́!

​​​​​​​Изведе́нным же да́ждь ду́х моли́твы, ду́х любви́ Твоея́, ду́х смире́ния, терпе́ния и ра́зума. Да́ждь и́м благовествова́ти си́лою мно́гою во исполне́ние Ева́нгелия Твоего́. Да укрепи́тся и возрасте́т жела́ние возжела́вших вспомоществова́ти на́м дела́ми любви́ благотворящей, да умно́жатся подо́бныя посо́бники на́ши. Благоде́ющим на́м возда́ждь Твои́ми благослове́ньми: живы́м пода́ждь здра́вие и благоде́нствие, усо́пших со святы́ми твои́ми в ве́чных селе́ниях упоко́й. Ненави́дящих и оби́дящих на́с прости́, Влады́ко Человеколю́бче, просвети́ и́х се́рдца, вразуми́ и́х умы́.

Все́м же на́м, кро́вию Твое́ю искупле́нным, веду́щим и еще́ не веду́щим Тя́, да́руй све́т ра́зума свята́го Ева́нгелия Твоего́. Ускори́ призва́ти и соедини́ти все́х во еди́но ста́до Твое́ зде́сь на земле́ и пребы́ти с Тобо́ю во ве́ки неразлучны во све́те Отца́ Твоего́ и Бо́га на́шего, Ему́ же с Тобо́ю и Святы́м Ду́хом сла́ва и держа́ва вове́ки.
Ами́нь.
Телефон:
Пишите нам:
Наш адрес:
г. Минск, ул. Севастопольская, 100
Добраться можно на троллейбусе № 29, 61.
Остановка «Севастопольский парк».
ВСЕ НОВОСТИ О ВОСКРЕСНОЙ ШКОЛЕ:
fgs16_instagram_square