Канон бессребреникам и чудотворцам

Песнь 3
Ирмос: Твоя песнословицы, Богородице, / живый и независтный источниче, / лик себе совокупльшия духовно утверди, / в Божественней Твоей славе // венцев славы сподоби.

Святии Безсребренницы и Чудотворцы, молите Бога о нас.

Якоже светила на Божественней тверди Церкве, / верныя озаряете светом чудес, / яже совершати не престаете, славнии, недуги исцеляюще.

Святии Безсребренницы и Чудотворцы, молите Бога о нас.

Равно течение совершивше, равных даров сподобистеся, / и почестей равных на Небеси получисте, / чудодейственнии Безмездницы.

Святии Безсребренницы и Чудотворцы, молите Бога о нас.

Любовию к Богу и ближним связаеми, / всю злобу демонов разрушаете благодатию: / сего ради ваше, досточуднии, совершаем торжество.

Святии Безсребренницы и Чудотворцы, молите Бога о нас.

Огнь Божественный внутрь носящим вам, / страстный пламень наш угасите, Богоблаженнии, / в вере смысл согревающе.

Святии Безсребренницы и Чудотворцы, молите Бога о нас.

​​​​​​​Тройственный сопруг Безмездников Космы и Дамиана / всечестный ныне воспеваем / делы единаковых, якоже и именованием.

​​​​​​​Святии Безсребренницы и Чудотворцы, молите Бога о нас.

Светлии житием, твердии верою и ревностию равнии / возсияша  из Рима, от Асии же и Аравии. / Темже нами вкупе да почтени будут.
 
Слава: Приидите, исцелитеся от недуг, болящии: / тричисленная бо двоица благодатию Троицы обогащенна, / врачевания подает верою поющим ю.
 
И ныне: Целителя душ и телес рождшая, / исцеление подаждь нам, Богородице, / елей милосердия Твоего изливающи ко здравию и спасению нашему.

Кондак, глас 2:
Благодать приимше исцелений, / простираете здравие сущим в нуждах, / врачеве, чудотворцы преславнии; / но вашим посещением ратников дерзости низложите, // мир исцеляюще чудесы.

Икос:
Всякаго разума и мудрости преходит слово мудрых врачев, / и всем знание подают: / Высочайшаго бо благодать приемше, / невидимо здравие даруют всем. / Отнюдуже и мне повести благодать даровася пети, / яко Богоносныя угодники Христовы и служители, / исцелений множество подающия: / болезней бо вся избавляют, / мир исцеляюще чудесы.

Седальны Безмездником, глас 8:
Яко крини, яко шипцы, Духом преукрашени, благовоние всем воспущаете. / Сего ради к вам прибегаем, Богоноснии Безсребреницы, / молитеся Христу Богу прегрешений оставление даровати / празднующим любовию святую память вашу.
 
Слава: Блаженныя надежды приимше , / от всех достойно блажитеся, / яко исполнителие Бога нашего Божественных хотений, / врачеве неисцельных недугов явльшеся, великоименитии Безмездницы. / Страсти убо наша исцелите и уныния разжените облаки, / с верою вас призывающих.
 
И ныне: Приидите, Всецарицу во гласех величаем, / и поюще, возопиим: / Яже радости вина, Дево всепетая, чтущих Тя спасай, / и покрый от искушений всяческих, и болезней, и скорбей. / Имаши бо яко Матерь Божия дерзновение миловати нас. / Сего ради молим Тя: / молися Сыну Твоему и Богу дати прощение рабом Твоим.

Песнь 4
Ирмос: Неизследный Божий Совет, / еже от Девы воплощения / Тебе, Вышняго, пророк Аввакум усмотряя зовяше: // слава силе Твоей, Господи.

Святии Безсребренницы и Чудотворцы, молите Бога о нас.

Се славная и всеясная Богосветлых врачев память возсия, / и веселит сердца христоименитых людей, / притекающих к целебным мощем их.

Святии Безсребренницы и Чудотворцы, молите Бога о нас.

Пантелеимона, прехвальнаго великомученика, / со Ермолаем, славным огласителем его, / зело лепо есть воспомянути днесь, / яко в Безсребреницех начальных.

Святии Безсребренницы и Чудотворцы, молите Бога о нас.

Усты вси и сердцем воспоим страстотерпцы Христовы, / Ермолая и Пантелеимона, / радуйтеся, — зовуще,— предстателие и заступницы обители сея и целителие наши.

Святии Безсребренницы и Чудотворцы, молите Бога о нас.

Ермолая освященными мольбами и Пантелеимона, милости тезоименита, / не отрини от нас милости Твоя, Всемилостиве Господи, / но обычно ущедр  ив, от злых избави.

Святии Безсребренницы и Чудотворцы, молите Бога о нас.

Светлый явился еси житием и борении светлейший, Пантелеимоне,/ званием свыше богатея, еже возвещаеши делы, / всех призывающих тя на помощь милуя.

​​​​​​​Святии Безсребренницы и Чудотворцы, молите Бога о нас.

​​​​​​​К твоему покрову прибегающих, Целебниче, отъемлеши всяку болезнь, / и ныне посети с верою молящихся тебе / и избави недуг многообразных.
 
Слава: Доброто честных Безсребреник, / благолепие святых мученик, врачу недугующих, / буди, Пантелеимоне, ходатай о нас ко Пресвятей Троице.
 
И ныне: Якоже чаша преисполняется, Владыко, благодать Твоя / и многое богатство человеколюбия / Всеблагою Материю Твоею и Безсребреники пречестными.

Песнь 5
Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем воспевающим Тя / мир подавающая.

Святии Безсребренницы и Чудотворцы, молите Бога о нас.

Кира и Иоанна Божественную любовь / и мученическую за Христа смерть воспоим, / борением бо славным мужески противуставше, / явишася похвала мучеников.

Святии Безсребренницы и Чудотворцы, молите Бога о нас.

Светила сияют два — Кир и Иоанн, / чудес сияния от источника единаго светоноснаго, / немощным источающе нетленную благодать, / ихже да ублажим.

Святии Безсребренницы и Чудотворцы, молите Бога о нас.

Христовы оружницы,  недугующим врачеве, / Кире и Иоанне пребогатии, / чудес действо от Всещедраго Бога приимшии, / исцелите поющия вы.

Святии Безсребренницы и Чудотворцы, молите Бога о нас.

Мокия песньми восхваляю, Фотия же и Аникиту, / в лице Богоносных Безмездников сущия, / скорыя помощники призывающих их в бедах и скорбех.

Святии Безсребренницы и Чудотворцы, молите Бога о нас.

Тя имущи светла бисера и честна во увязении своем, / честная Церковь украшается, / всеблаженне Мокие, врачу безмездный.

​​​​​​​Святии Безсребренницы и Чудотворцы, молите Бога о нас.

​​​​​​​Явистеся яко велиции светильницы, / просвещающе лучами исцелений и Божественных подвиг всю тварь, / страдальцы Христовы Фотие и Аникито.
 
Слава: Исцеляете страсти верных, / изобразивше страсть блаженную вашими страстьми, / и отъемлете недуги, и отгоняете лютыя духи, / Фотие и Аникито славнии.
 
И ныне: Немощь и разслабление, всемощная Владычице, душ и телес ниших / преложи в крепость и здравие, / во еже бодренно творити повеления Сына Твоего и Бога. 

Песнь 6
Ирмос: Божественное сие и всечестное / совершающе празднество, / Богомудрии, Богоматере, / приидите руками восплещим, /  от Нея рождшагося Бога славим.

Святии Безсребренницы и Чудотворцы, молите Бога о нас.

Всечестное совершающе празднество ваше, христоподражателие прехвальнии и ходатае теплейшии, / еже у вас просим верно помощи.

Святии Безсребренницы и Чудотворцы, молите Бога о нас.

Повелению Божественному повинующеся, Богомудрии, / не восхотесте ничесоже взяти в возмездие, / тунe приясте, туне даете, яже к животу и спасению.

Святии Безсребренницы и Чудотворцы, молите Бога о нас.

Сампсона, преподобнаго с Диомидом / днесь честная похваления лика Безсребреник вси почтим, / молитвенники предлагающе сих к Богу и Царю всех.

Святии Безсребренницы и Чудотворцы, молите Бога о нас.

Твоим преславным, отче, врачевством, еже болезньми стяжал еси,/ посещати не оскудей, молимся, / в сострадании облегчая болезни и труды душ наших.

Святии Безсребренницы и Чудотворцы, молите Бога о нас.

Божественною одеян, мучениче Диомиде, силою, / уставляеши болезни, разрешаеши недуги и отгоняеши духи лукавыя, / яко в Безмездницех преизрядный.

Святии Безсребренницы и Чудотворцы, молите Бога о нас.

​​​​​​​Богатыми тя украси благодать Духа даровании: / молитвами бо твоими, Артемие славне, / всяк недуг престает в людех, прибегающих к тебе.
 
Слава: Страстей тлительных изми ны, великомучениче, / искушений же и скорбей тя призывающия с верою, / подражателю Спасов, Артемие, Троицы угодниче.
 
И ныне: Избави нас, Пречистая Владычице, / всякаго гнева, глада же и всегубительства, / и вечнаго мучения, Дево, свободи Артемия предстательством.

Песнь 7
Ирмос: He послужиша твари Богомудрии / паче Создавшаго, / но огненное прещение мужески поправше, / радовахуся поюще: / препетый отцев Господь и Бог благословен еси.

Святии Безсребренницы и Чудотворцы, молите Бога о нас.

Како восхвалим вас, всехвальнии, превосходящии и ум и слово наше, / и зело удивляющии  чудесы, о нихже зовем: / отцев Господь Бог благословен еси.

Святии Безсребренницы и Чудотворцы, молите Бога о нас.

Не возлюбисте отнюдь суеты Богомудрии, ниже сладких жития, / но вся во уметы вменисте, Христа имуще, Емуже взываете: / Господь Бог благословен еси.

Святии Безсребренницы и Чудотворцы, молите Бога о нас.

Како не воспоем печать и хвалу славнаго лика Безмездников, / честную двоицу — Фалалея же и Трифона доблемудрых, / чудес непрестающее творящих множество.

Святии Безсребренницы и Чудотворцы, молите Бога о нас.

Явишася исцеление верным кровей твоих капли, Фалалее, / недуги отмывающе и огнепаления лютая угашающе, / благодатию Христа Венцедавца.

Святии Безсребренницы и Чудотворцы, молите Бога о нас.

Гуси пасый в лузех, от Бога приял еси благодать исцелений, / великомучениче Трифоне — безмездный врачу, / исцеляти человеческия немощи и недуги.

Святии Безсребренницы и Чудотворцы, молите Бога о нас.

​​​​​​​Струпи твои, мучениче Трифоне, яко миро благоухают, / кровь твоя источает исцеления, / останцы же тела твоего души освящают касающихся им.
 
Слава: Телесныя болезни избави и душевнаго неможения рабы Твоя, / Триипостасный Боже,/ и сохрани неврежденны от всех житейских искушений.
 
И ныне: Источаеши с Безсребреники честными / исцелений струи болящим, Дево, всюду: / Тя бо источника милосердия показа милости Господь, из Тебе воплотивыйся. 

Песнь 8
Ирмос: Отроки благочестивыя в пещи / Рождество Богородичо спасло есть, / тогда убо образуемое, / ныне же действуемое, / вселенную всю воздвизает пети Тебе: / Господа пойте дела, / и превозносите Его во вся веки.

Святии Безсребренницы и Чудотворцы, молите Бога о нас.

Свят еси, Вседержителю, прославляя святыя Твоя: / мир бо тех ради избавлявши от бед / и просвещаеши поющия и превозносящия Тя во веки.

Святии Безсребренницы и Чудотворцы, молите Бога о нас.

В села Вышняя вселяеми, всеприснопамятнии, / милосердовати не престаете о сущих на земли / и благодетельствуете поющим и превозносящим Господа во веки.

Святии Безсребренницы и Чудотворцы, молите Бога о нас.

Словесным тя и безсловесным благодетеля / еже к Богу присвоение показа, блаженне Власие, исправлений твоих; / темже убо приял еси исцелений дарования.

Святии Безсребренницы и Чудотворцы, молите Бога о нас.

Святитель преподобен сый, Власие, / страстей Христовых раны носиши, / давшаго Ти благодать врачевати вся болезни; / темже даровании благими нам буди на помощь.

Святии Безсребренницы и Чудотворцы, молите Бога о нас.

Ум твой Спиридоне, безстрастием просветив и смирением украсився, / даровании Духа обогатился еси отгоняти духи / и решити недуги верно чтущим тя.

Святии Безсребренницы и Чудотворцы, молите Бога о нас.

​​​​​​​Река сущих в тебе дарований всяко напояет, преподобие Спиридоне, сердце; / всем дарует здравие, / вся Бога к славе возставляет прославльшаго тя.
 
Благословим Отца, и Сына, и Святаго Духа, Господа.
 
Милостива еси, Троице Нераздельная, / милуеши бо всех яко всещедра, / темже прибегаем к Тебе, иже грехми отягчаеми, взывающе: / очисти рабы Твоя.
И ныне:
О иже на Тя надежды возложивших, Владычице,/ с Безсребреники молися, яко да будущаго осуждения избавимся/ и входа в Царствие Небесное сподобимся.

Песнь 9
Ирмос: Всяк земнородный / да взыграется, Духом просвещаемь, / да торжествует же безплотных умов естество, / почитающее священное торжество Богоматере, / и да вопиет: / радуйся, Всеблаженная // Богородице, Чистая Приснодево.

Святии Безсребренницы и Чудотворцы, молите Бога о нас.

Память совершающе общих заступников наших, / прилежно возопиим к ним: / от всякаго вреда, и скорби, и недугов лютых измите воспевающия вы.

Святии Безсребренницы и Чудотворцы, молите Бога о нас.

Во святителех чудодейственника и в страстотерпцех помощника безмезднаго, / недужных врача и язвы моровыя прогонителя, / Харалампия да ублажим.

Святии Безсребренницы и Чудотворцы, молите Бога о нас.

Велий защитник верных / и избавитель от бед показался еси, Богомудре Харалампие, / всякаго убо свободи гнева и всегубительства славящия тя.

Святии Безсребренницы и Чудотворцы, молите Бога о нас.

Телеснии недузи и душевнии престают, / твоим, Харалампие, мощем почитаемым и лобызаемым: / Христос бо дарова сия целебны и лютых отразительны.

Святии Безсребренницы и Чудотворцы, молите Бога о нас.

Светильника Церкве, на свещнице Сиона поставленнаго, / восхвалим днесь Модеста, милосердия лучами сияюща, / человеков и скотов болезни исцеляюща.

Святии Безсребренницы и Чудотворцы, молите Бога о нас.

Иерусалима дольняго пастырь был еси, / сострадательствуя словесным и безсловесным, / и Горняго града еси всельник, / идеже поминай поминающия тя.
 
Слава: Приимите, христоподражательнии Безсребреницы, сие малое песнопение наше, / и многим грехом повинным сущим, / прощение нам у Троицы испросите.
 
И ныне: Спасе Благий, препетыя Твоея Матере мольбами / и всех прехвальных Безмездников, / милость Твою и помощь с Небесе ниспосли нам, призывающим Тя. 
 
Величаем Вас / святии Безсребренницы и Чудотворцы / и чтим святую память вашу / вы бо молите за нас // Христа Бога нашего.